રાપર: પૂર્વ કચ્છના વાગડ વિસ્તારમાં સાધુના વેશમાં આવીને ભોળા લોકોને શીશામાં ઉતારતી 'લોટા ગેંગ' અચાનક પ્રગટ નથી થઈ, પરંતુ છેલ્લા ૬ મહિનાથી આ વિસ્તારમાં ખુલ્લેઆમ અને બેખૌફ ફરી રહી હોવાનો ચોંકાવનારો ખુલાસો થયો છે. ફેબ્રુઆરી મહિનામાં સણવા ગામમાં ૧.૬૦ લાખ રૂપિયાનો હાથ માર્યા પછી પણ આ ગઠિયાઓ પકડાયા ન હતા. પરિણામે તેમનો આત્મવિશ્વાસ એટલો વધી ગયો કે ૬ મહિના પછી, હમણાં જ કલ્યાણપર ગામમાં તેમણે એ જ પદ્ધતિથી વધુ એક પશુપાલકને ૬૧ હજારનો ચૂનો ચોપડ્યો છે.
સૌથી આશ્ચર્યની વાત એ છે કે, ફેબ્રુઆરીમાં બનેલી ઘટનાની ફરિયાદ છેક હવે (૯ ઓગસ્ટના રોજ) નોંધાઈ છે, અને સાથે જ કલ્યાણપરની નવી ઘટનાની ફરિયાદ પણ સામે આવી છે.
કેવી રીતે ખૂલી ૬ મહિના જૂની પોલ? (ઘટનાનું સમયચક્ર)
આ ગેંગ કેટલી શાતિર છે અને કઈ રીતે એક જ વિસ્તારમાં લાંબા સમયથી સક્રિય છે, તે આ ઘટનાક્રમ પરથી સ્પષ્ટ થાય છે:
* શિકાર ૧: સણવા ગામ (૧૫ ફેબ્રુઆરી ૨૦૨૬):
મહાશિવરાત્રીના દિવસે રમેશનાથ, અનોપનાથ અને નરેશનાથ નામના ત્રણ ગઠિયા સણવા ગામના માધુબેન રબારીના ઘરે પહોંચ્યા. 'ઘાત' ટાળવાના બહાને બે લોટા મંગાવી, નજરબંધી કરીને રૂ. ૧.૬૦ લાખના સોનાના દાગીના (ચણપગલું, ડોડી, ઠોરીયા) સેરવી લીધા અને ધૂળ ભરેલો લોટો પકડાવી દીધો. ગઠિયાઓએ ૭ દિવસ લોટો ન ખોલવાનું કહ્યું હતું. ભોગ બનનાર પરિવારે શરમ કે ડરના માર્યા લાંબો સમય ફરિયાદ ન કરી.
* શિકાર ૨: કલ્યાણપર ગામ (ઓગસ્ટ ૨૦૨૬ નું પહેલું અઠવાડિયું):
સણવાની ઘટનામાં ૬ મહિના સુધી કોઈ પોલીસ ફરિયાદ ન થતાં અને પોતે ન પકડાતા ગઠિયાઓની હિંમત ખુલી ગઈ. સફેદ કારમાં વટથી આ જ નરેશનાથ અને રમેશનાથ (ત્રીજો સાથીદાર આંબાનાથ) કલ્યાણપરના મેપાભાઈ રબારીના ઘરે પહોંચ્યા. આ વખતે બહાનું 'હાથનો દુખાવો' મટાડવાનું હતું. ફરી એ જ બે લોટાની થિયરી અને દાગીનાવાળા લોટાની અદલાબદલી! આ વખતે ૬૧,૦૦૦ રૂપિયાની મત્તા ઉડાવી ગયા.
* ફરિયાદનો ધમધમાટ (૯ ઓગસ્ટ ૨૦૨૬):
કલ્યાણપરની ઘટના તાજી જ છે, ત્યાં બીજી તરફ સણવા ગામના માધુબેને ગામના અગ્રણી ગોવિંદભાઈ રબારીની સમજાવટ બાદ છેક ૯ ઓગસ્ટ ૨૦૨૬ના રોજ આડેસર પોલીસ મથકે પોતાની ૬ મહિના જૂની ઘટનાની સત્તાવાર FIR નોંધાવી. જ્યારે કલ્યાણપરની ઘટનાની ફરિયાદ રાપર પોલીસ મથકે નોંધાઈ છે.
પોલીસ માટે હવે તપાસનો માર્ગ ખુલ્લો
જો સણવા ગામના પરિવારે ફેબ્રુઆરીમાં જ જાગૃત થઈને ફરિયાદ નોંધાવી દીધી હોત, તો કદાચ કલ્યાણપરના મેપાભાઈ આજે ૬૧ હજાર ગુમાવીને રોવાનો વારો ન આવ્યો હોત! આ લોટા ગેંગની મોડસ ઓપરેન્ડી (ગુનાની પદ્ધતિ) અને આરોપીઓના નામ બંને કેસમાં સમાન છે.
હવે જ્યારે આડેસર અને રાપર - એમ બંને પોલીસ મથકોમાં સત્તાવાર રીતે ગુનો દાખલ થઈ ચૂક્યો છે, ત્યારે પોલીસે આ બંને કેસને એકસાથે જોડીને (Link કરીને) તપાસ કરવી પડશે. ૬ મહિનાથી વાગડમાં આટાફેરા કરતી આ ગેંગે આ બે ગામ સિવાય અન્ય કેટલાય ભોળા લોકોને પોતાના શિકાર બનાવ્યા હોવાની પૂરેપૂરી શક્યતા છે, જે પોલીસની કડક પૂછપરછમાં જ
બહાર આવી શકશે.
0 ટિપ્પણીઓ